Hum Toyein Ge Itna Humein Maloom Nahin Tha

Bachpan mein jisay chand suna tha

Ho jaye ga Wo chehra na yeh socha tha

Waise to nazar aate hain sab apne hain lekin

Koi nahin hai apna humein maloom nahin tha

Hum royein ge itna humein maloom nahin tha

Beh jaye ga chehra hamein maloom nahin tha

Aasan they magar sada dil aise bhi nahin thay

Kha jayen gay dhoka reh jayin ge tanha

Kya shay hai ujarna humein maloom nahin tha

Hum royein ge itna humein maloom nahin tha

Beh jaye ga chahra humein maloom nahin tha

Aoron ke liye hum basatay rehe dunya

Kho jaye ga rasta par jaye ga marna

Ho jaye ga saaya humen maloom nahi tha

saieyan tera rog muhabbat

saieyan tera jog muhabbat

saieyan mere darya sookhay

saieyan lehjay pheekay rookhay

saieyan kr le mann ki baten

saieyan beet na jayen raaten

saieyan dekh main aik ikalli

saieyan teri kamli jhalli

saieyan khwaab piro deti hain

saieyan ankhen ro deti hain

saieyan apni basti le chal

saieyan meri masti le chal

saieyan apni kirpa kr de

saieyan nain kitoray bhar de

saieyan apni deed kara de

saieyan mujh ko eid kara de

saieyan tujh per vaari ho gayi

main saray ki saari ho gayi

saieyan aaj tumhari ho gayi

main bhi raaj kumari ho gayi

aansu dhaani ho jatay hain

aanchal paani ho jatay hain

teri chah main marne walay

loag kahani ho jatay hain

kuch aisay bhi chehray hain jo

yaad zabani ho jatay hain

khel wo khelen jis main hum tum

raja raani ho jatay hain

aawazen gum ho jati hain

harf nishaani ho jatay hain

zain chalo hum khamoshi se

baat purani ho jatay hain

kisi k ankh se niklay sitaray baant lene thay

kinaray batt nahi saktay saharay baant lene thay

muhabbat main kabi nuqsaan to hota nahi lekin

samjhna tha yehi to phr khasaray baant lene thay

jisay tum ne bhulaya hai wohi ik shakhs tha aisa

k jis ne muskura kr dukh tumharay baant lene thay

so ab nazron ka shikwa kiu yeh pehle soch lete naa

nigahain baant leni theen, isharay baant lene thay

kaha tha naa k mere bin kathin ho jaye ga jeena

so meri maan leni thi guzaray baant lene thay

jisay fursat nahi milti hamaray paas anay ki

kahan phr zain us ne gham hamaray baant lene thay

musalsal hi bhulaya jaa raha hon

main likh likh kr mitaya jaa raha hon

mujhay sunnay pe jo raazi nahi hai

usay phir bhi sunaya jaa raha hon

mujhay har torr hai mitti main milna

nigahon se bahaya jaa raha hon

muhabbat ne seyasat seekh li hai

saleeqay se sataya jaa raha hon

ajab hai hath uska thaamna bhi

utha kr phir giraya jaa raha hon

jahan per imtehaan banta nahi hai

waheen per aazmaya jaa raha hon

mujhay kya geet samjhi zain duniya

jo itna gungunaya jaa raha hon