Ranjish Hi Sahi Dil Hi Dukhane Ke Liye Aa

Ranjish hī sahī dil hī dukhāne ke liye aa
aa phir se mujhe chhoḌ ke jaane ke liye aa
kuchh to mire pindār-e-mohabbat kā bharam rakh
tū bhī to kabhī mujh ko manāne ke liye aa
pahle se marāsim na sahī phir bhī kabhī to
rasm-o-rah-e-duniyā hī nibhāne ke liye aa

kis kis ko batā.eñge judā.ī kā sabab ham
tū mujh se ḳhafā hai to zamāne ke liye aa
ik umr se huuñ lazzat-e-girya se bhī mahrūm
ai rāhat-e-jāñ mujh ko rulānaae ke liye aa
ab tak dil-e-ḳhush-fahm ko tujh se haiñ ummīdeñ
ye āḳhirī sham.eñ bhī bujhāne ke liye aa

chupke chupke raat din aañsū bahānā yaad hai
ham ko ab tak āshiqī kā vo zamānā yaad hai
bā-hazārāñ iztirāb o sad-hazārāñ ishtiyāq
tujh se vo pahle-pahal dil kā lagānā yaad hai
baar baar uThnā usī jānib nigāh-e-shauq kā
aur tirā ġhurfe se vo āñkheñ laḌānā yaad hai

tujh se kuchh milte hī vo bebāk ho jaanā mirā
aur tirā dāñtoñ meñ vo uñglī dabānā yaad hai
khīñch lenā vo mirā parde kā konā daf.atan
aur dupaTTe se tirā vo muñh chhupānā yaad hai
jaan kar sotā tujhe vo qasd-e-pā-bosī mirā

aur tirā Thukrā ke sar vo muskurānā yaad hai
tujh ko jab tanhā kabhī paanā to az-rāh-e-lihāz
hāl-e-dil bātoñ hī bātoñ meñ jatānā yaad hai
jab sivā mere tumhārā koī dīvāna na thā
sach kaho kuchh tum ko bhī vo kār-ḳhānā yaad hai
ġhair kī nazroñ se bach kar sab kī marzī ke ḳhilāf

vo tirā chorī-chhupe rātoñ ko aanā yaad hai
aa gayā gar vasl kī shab bhī kahīñ zikr-e-firāq
vo tirā ro ro ke mujh ko bhī rulānā yaad hai
dopahar kī dhuup meñ mere bulāne ke liye
vo tirā koThe pe nañge paañv aanā yaad hai

aaj tak nazroñ meñ hai vo sohbat-e-rāz-o-niyāz
apnā jaanā yaad hai terā bulānā yaad hai
mīThī mīThī chheḌ kar bāteñ nirālī pyaar kī
zikr dushman kā vo bātoñ meñ uḌānā yaad hai
dekhnā mujh ko jo bargashta to sau sau naaz se
jab manā lenā to phir ḳhud ruuTh jaanā yaad hai
chorī chorī ham se tum aa kar mile the jis jagah

muddateñ guzrīñ par ab tak vo Thikānā yaad hai
shauq meñ mehñdī ke vo be-dast-o-pā honā tirā
aur mirā vo chheḌnā vo gudgudānā yaad hai
bāvajūd-e-iddi.ā-e-ittiqā 'hasrat' mujhe
aaj tak ahd-e-havas kā vo fasānā yaad hai
vo jo ham meñ tum meñ qarār thā tumheñ yaad ho ki na yaad ho

vahī ya.anī va.ada nibāh kā tumheñ yaad ho ki na yaad ho
vo jo lutf mujh pe the beshtar vo karam ki thā mire haal par
mujhe sab hai yaad zarā zarā tumheñ yaad ho ki na yaad ho
vo na.e gile vo shikāyateñ vo maze maze kī hikāyateñ
vo har ek baat pe rūThnā tumheñ yaad ho ki na yaad ho
kabhī baiThe sab meñ jo rū-ba-rū to ishāratoñ hī se guftugū

vo bayān shauq kā barmalā tumheñ yaad ho ki na yaad ho
hue ittifāq se gar baham to vafā jatāne ko dam-ba-dam
gila-e-malāmat-e-aqribā tumheñ yaad ho ki na yaad ho
koī baat aisī agar huī ki tumhāre jī ko burī lagī
to bayāñ se pahle hī bhūlnā tumheñ yaad ho ki na yaad ho
kabhī ham meñ tum meñ bhī chaah thī kabhī ham se tum se bhī raah thī

kabhī ham bhī tum bhī the āshnā tumheñ yaad ho ki na yaad ho
suno zikr hai ka.ī saal kā ki kiyā ik aap ne va.ada thā
so nibāhane kā to zikr kyā tumheñ yaad ho ki na yaad ho
kahā maiñ ne baat vo koThe kī mire dil se saaf utar ga.ī
to kahā ki jaane mirī balā tumheñ yaad ho ki na yaad ho
vo bigaḌnā vasl kī raat kā vo na mānñā kisī baat kā

vo nahīñ nahīñ kī har aan adā tumheñ yaad ho ki na yaad ho
jise aap ginte the āshnā jise aap kahte the bā-vafā
maiñ vahī huuñ 'momin'-e-mubtalā tumheñ yaad ho ki na yaad ho